Нийгэмнийтлэлчид

Байр суурь: Би Нямбаатарт дуртай биш. Түүний олон үйлдлийг сайшаадаггүй

Байр суурь: Би Нямбаатарт дуртай биш. Түүний олон үйлдлийг сайшаадаггүй

ЦАХИМ ГАВ……

Би Нямбаатарт дуртай биш. Түүний олон үйлдлийг сайшаадаггүй. Гэхдээ цахим гав гэдэг зүйл яг одоо яригдаж байгаа зүйл биш. Тэмүүжингийн үед ч, түүнээс өмнө ч яригдаж байсан зүйл. Цахим гавыг гэр бүлийн хүчирхийлэл үйлдэгчид шүүхийн дагуу хохирогчид 1000 метрийн зайнд ойртож болохгүй гэдэг шийтгэл оноосны дараа хэрэглэдэг. Өөрөөр хэлбэл, нэгдүгээрт, хохирогчийн амь насыг хамгаалж буй, хоёрдугаарт, гэр бүлийн хүчирхийлэл үйлдэгч бүрийг заавал шоронд хорихгүй байх ялын энэрэнгүй бодлогын нэг хэсэг. Дэлхий даяараа гэр бүлийн хүчирхийлэлтэй тэмцэх эрх зүйн орчныг сайжруулахдаа АНУ-ын Миннесота мужид хэрэгжсэн Дулут моделийг хэрэглэсэн бөгөөд гэр бүлийн хүчирхийллийг таслан зогсооход төр /цагдаа, прокурор, шүүх, нутгийн удирдлага/-ийн бодитой, хүчтэй гаднын оролцоо хэрэгтэй бөгөөд шууд баривчилдаг загварчлал юм. Үүнийг хэрэгжүүлснээр гэр бүлийн хүчирхийлэлтэй үл эвлэрэх явдал бий болж, хүчирхийлэл үйлдэгчийн үйлдлийг шууд таслан зогсоож хүмүүсийн амь нас, эрүүл мэндийг хамгаалж чаддаг. Хүчирхийлэл үйлдэгчийг шууд баривчлах, цахим гав суулган, хохирогчид ойртуулахгүй байх, шоронд суулгахаас илүүтэй зан үйлийн сургалтад хамруулах зэрэг энэрэнгүй ялын бодлогыг хэрэгжүүлэх туршлага байдаг. Хүн засарч болно. Хохирогч, хүчирхийлэл үйлдэгч нарын хооронд үр хүүхэд, хайрын болон бусад харилцаа, хамаарал оршин байдаг гээд энэ асуудалд нухацтай хандах шаардлага зайлшгүй байдаг. Энэ асуудлаар хүний эрхийн ямар ч боловсролгүй худал, хуурмаг, улс төрийн ашиг хонжоо хайсан, од болохын өвчин туссан, цаазын ял гэж хашхирсан /эмэгтэй шүү/, охид, эмэгтэйчүүдийн хүчирхийллээр од болохыг хэт их хичээсэн зарим нэг этгээдийн яриаг биш, яг мэргэжлийн хүмүүсийн үгийг сонсох хэрэгтэй. Номын дууг нь сонссон, яг энэ асуудлаар газар дээр нь ажилладаг АРВИНТАРИА мэтийн мэргэжлийн өмгөөлөгч, хуульчдын үгийг сонсох хэрэгтэй. Хэн нэгнийг өмгөөлөх гэсэнгүй, хэн нэгнийг муулах гэсэнгүй. Цахим гав нэвтрүүлэх нь зөв. Гэхдээ одоо яригдаад байгаа сайд нарын шахааны бизнес болгож болохгүй. Нээлттэй тендерээр нийлүүлэх компанийг шударгаар сонгох ёстой. Зарим нэг зүйлд дуугүй өнгөрч болохгүй юм аа. Мэргэжлийн хүн мэргэжлийн асуудалдаа үгээ хэлэх л хэрэг гарах юм. Сайн ойлгож уншаарай.

Хүний эрхийн хуульч Манжаагийн Ичинноров